Кога посакувате долги и волуменски трепки, честопати се одлучувате за надоградба со вештачки трепки, а со тоа можете да ги оштетите вашите природни трепки. Ако забележите дека трепките ви опаѓаат или се кршливи можеби ќе треба да ја дополните нивната нега со серум. Помислете на тоа како на производ за нега на кожата, но наменет за трепки. Во продолжение дознајте сè за тоа како да го комбинирате серумот со маскарата.
Што точно е серум за трепки?
Серумите за трепки се хранливи третмани кои се формулирани да ги негуваат и зајакнат трепките. Како резултат од редовната употреба на серумот, трепките ќе ви изгледаат пополни и подолги. При изборот на добар серум за трепки, проверете дали содржи аминокиселини и кератин, бидејќи тоа се состојки што спречуваат кршење и опаѓање на трепките, процеси што можат да бидат предизвикани од виткачите на трепки и средствата за отстранување на шминка.
Како се применува серумот за трепки?
Секој серум е различен, но повеќето од нив се спакувани во туба со четка како за маскара. Некои серуми се нанесуваат само на коренот на трепките, а некои се нанесуваат по целата должина на трепките. Без оглед на тоа кој серум го користите, секогаш нанесувајте го на чисти трепки, после миење и чистење на лицето. Повеќето серуми за трепки можат да се користат во иста рутина со маскарата и тоа ќе биде одлична хранлива подлога за маскарата.
Кога нанесувате серум на трепките, натопете ја четката во тубата и отстранете го вишокот. Не ставајте големи количини од производот на трепките, бидејќи серумот е прилично концентриран, а ефектот ќе го забележите со редовна употреба.
Серум за трепки + маскара!
Кога ќе нанесете серум на трепките, почекајте една до две минути да се впие и потоа можете да ја нанесете омилената маскара во еден или два слоја. Ќе забележите дека серумот ќе делува како одличен прајмер за маскарата, а трепките ќе изгледаат раскошно.
