СПФ крем – SPF (Sun Protection Factor)
Желбата да се најде тој неверојатен производ што ќе ни даде поубав и сјаен тен, скоро секогаш е присутна! Наше омилено хоби е проучување и исчекување на нови производи за чистење на лицето и одлични навлажнувачки креми со иновативни формули. Веќе имаме создадено одредена рутина за нега на кожата што одговара на нашата кожа и нејзините потреби, но никогаш нема да одбиеме да пробаме нешто ново. Но, на еден производ многу често забораваме, а тој е исклучително важен ако сакаме правилно да се грижиме и да ја заштитиме нашата кожа. Тој производ е крем со заштитен фактор!
Ако ги прашате дерматолозите за најдобриот начин како да се грижите за вашето лице, сите едногласно ќе се согласат дека кремот со заштитен фактор (СПФ крем) е составен дел од секоја успешна рутина за нега на кожата. Сепак, многумина од нас избираат да го игнорираат овој производ, најчесто од две причини. Првата е дека има периоди во годината кога не го гледаме сонцето со денови, па дури и со недели. Втората причина дефинитивно е фактот дека стана премногу комплицирано да се снаоѓаме помеѓу кремите кои нудат заштита од УВА и УВБ зраци, а потоа и заштита со широк спектар. Важно е да знаете што треба да барате при изборот на крем со заштитен фактор (СПФ крем), а во продолжение ви нудам мал водич кој ќе ви помогне да го изберете најдобриот производ за заштита од сонце.
СПФ, УВА и УВБ: Што значи сето тоа?
СПФ е кратенка од фактор на заштита од сонце, поточно од УВБ зрачењето. Едноставно кажано, колку е поголем факторот, толку е поголема УВБ заштитата. УВБ зраците варираат во текот на денот и се најсилни напладне. Тие го стимулираат создавањето на меланин, одговорен за нашиот тен. Покрај тоа, ги стимулираат клетките да формираат подебел епидермис. УВБ зраците се оние кои предизвикуваат изгореници и оштетување на кожата, особено во текот на летните месеци. Тие не продираат толку длабоко, но создаваат слободни радикали на сите нивоа на епидермисот.
Од друга страна, УВА е кратенка за ултравиолетови А зраци кои продираат подлабоко во кожата. Производите што содржат УВА+ симбол мора да обезбедат минимално ниво на заштита од УВА зраците. Односот треба да биде 1:3 за заштита од УВА:УВБ. Ако на кремот пишува дека обезбедува заштита со широк спектар, тоа значи дека нуди УВА и УВБ заштита.
Која е разликата помеѓу УВА и УВБ зраците?
Се работи за различни бранови должини на светлината. УВБ брановите предизвикуваат изгореници и предвремено стареење на кожата. Од друга страна, УВА брановите продираат подлабоко во кожата каде што предизвикуваат оштетувања. УВА и УВБ зраците го оштетуваат колагенот и предизвикуваат создавање на фини линии, брчки и хиперпигментација. УВА зраците сочинуваат околу 95% од УВ светлината што допира до нас и се сметаат за најголема закана за кожата. Тие се присутни секогаш кога е ден, без разлика дали надвор е сончево или не, а можат да навлезат преку стакло. Од друга страна, УВБ зраците имаат многу помал домет, но се одговорни за видливите промени на површината на кожата, како што се изгорениците.
Кремите со заштитен фактор треба да станат производ што мора да го имате!
Постојат многу контрадикторни совети за тоа колку крем со заштитен фактор треба да нанесеме со секое нанесување. Но, факт е дека повеќето од нас не ставаат доволно крем. Треба да нанесеме доволна количина крем со заштитен фактор на лицето, рацете и вратот и доволна количина на крем со заштитен фактор на целото тело. Доволно е само лесно да ја покриете кожата со крем како последен чекор во вашата рутина за нега на кожата, околу 30 минути пред да излезете надвор.
Меѓутоа, ако е лето, дерматолозите советуваат да го нанесувате кремот секој ден, непосредно пред излегување. Потоа, на неколку часа кога сте надвор изложени на сонце. Ако навистина сакате да заштедите време, изберете козметички производи со СПФ заштита или уште подобро со заштита со широк спектар. Постојат многу хидратантни креми, пудри, балсами за усни и лакови за коса кои се формулирани со заштита од сонце, па затоа не мора да се грижите да нанесувате крем одделно.
